پاکستان تحریک انصاف کے رہنما خرم شیر رمان نے کہا ہے کہ حلیم عادل شیخ کی جان کو حکومت سندھ سے خطرہ ہے، وزارت داخلہ حلیم عادل شیخ کی سیکیورٹی کے لیے فوری رینجرز تعینات کرے۔
تفصیلات کے مطابق پاکستان تحریک انصاف کے رہنما خرم شیر رمان نے حلیم عادل شیخ پر تشدد کے معاملے پر ردعمل کا اظہار کرتے ہوئے کہا ہے کہ حکومت سندھ انتقام کی آگ میں اندھی ہو چکی ہے، اپوزیشن لیڈر کو ڈرانے کے لیے اوچھے ہتھکنڈے استعمال کیے جا رہے ہیں۔
خرم شیرزمان کا کہنا تھا کہ جیل میں نجی غنڈوں کے ذریعے حملہ کرایا گیا، سیاسی مخالفین کے لیے جیل نجی ٹارچر سیل بنا دیے گئے ہیں، ہم مسلسل اپنے خدشات کا اظہار کر رہے ہیں۔
پی ٹی آئی رہنما نے کہا کہ حلیم عادل شیخ کی جان کو حکومت سندھ سے خطرہ ہے، کسی کارکن کو نقصان ہوا تو ذمےدار مراد علی شاہ ہوں گے، این آئی سی وی ڈی میں کرپشن بےنقاب کرتے رہے ہیں، این آئی سی وی ڈی میں بھی کوئی سازش ہو سکتی ہے۔
انھوں نے وزارت داخلہ سے مطالبہ کیا کہ حلیم عادل شیخ کی سیکیورٹی کے لیے فوری رینجرز تعینات کرے۔
یاد رہے پی ٹی آئی نے الزام لگایا تھا کہ جیل منتقل ہونے کے بعد حلیم عادل شیخ کو گینگ وار سمیت دیگر غنڈہ عناصر نے تشدد کا نشانہ بنایا، آرتھو پیڈک سربراہ اے آر جمالی نے حلیم عادل شیخ کا معائنہ کر کے راڈ لگی ہوئی ٹانگ سمیت جسم کے دیگراعضاء پر چوٹوں کی تصدیق کی تھی۔
