28 جنوری, 2021
2
بین الاقوامیامریکہایشیاخبریں

امریکہ نے چین پر نئی ویزا پابندیاں عائد کر دیں

امریکہ نے چین سے متعلق نئی ویزا پابندیاں متعارف کروا دی ہیں جنھیں چینی وزارت خارجہ نے سیاسی دباؤ اور سرد جنگ کی ذہنیت کا نتیجہ قرار دیا ہے۔ 

امریکی خبر رساں ادارے کے مطابق دفتر خارجہ کے ترجمان نے تصدیق کی ہے کہ چین کی کمیونسٹ پارٹی کے تمام ارکان کو ویزے کے اجرا میں نئی پابندیاں متعارف کروا دی گئی ہیں۔

نئے قوانین کے مطابق چین کی کمیونسٹ پارٹی کے ارکان اور ان کے اہل خانہ کو صرف امریکہ کے سفر کے لیے زیادہ سے زیادہ ایک ماہ کا ویزا جاری کیا جائے گا جب کہ اس ویزا پر انہیں ایک ہی بار امریکہ آنے کی اجازت ہوگی۔ اس سے قبل اس ویزے کی مدت 10برس تک تھی۔

یاد رہے کہ یہ فیصلہ اس وقت سامنے آیا ہے جب امریکی صدر ڈونلڈ ٹرمپ کے صدارت سے سبکدوش ہونے میں 2 ماہ کا عرصہ رہ گیا ہے۔ امریکی صدر ڈونلڈ ٹرمپ نے تجارتی معاہدوں اور کرونا وائرس کے بعد چین سے متعلق انتہائی سخت گیر مؤقف اختیار کیا ہے جس کے بعد دنیا کی ان دو بڑی اقتصادی طاقت تسلیم کیے جانے والے ممالک کے تعلقات انتہائی کشیدہ ہو چکے ہیں۔

امریکی دفتر خارجہ کے ترجمان نے الزام عائد کیا کہ چینی کمیونسٹ پارٹی امریکہ میں چینی امریکی گروپوں کی سرگرمیوں اور انسانی حقوق کے لیے کام کرنے والے مختلف گروہوں کو دھمکانے اور ان کی  جاسوسی کے لیے اپنے ایجنٹ بھیجتی۔

ترجمان کا کہنا ہے کہ امریکہ نے برسوں کمیونسٹ پارٹی کو امریکہ میں  اداروں اور کاروباری مواقع تک آزادانہ رسائی دی جبکہ چین میں امریکی شہریوں کے ساتھ کبھی یکساں سلوک نہیں رکھا گیا۔

تاہم اس بیان میں ابھی تک یہ واضح نہیں کیا گیا ہے کہ اس پابندی کا اطلاق کس طرح کیا جائے گا کیوں کہ چین کی کمیونسٹ پارٹی کے 92 لاکھ ارکان ایسے ہیں جو براہ راست سیاسی و ریاستی امور سے تعلق نہیں رکھتے۔

اس سے قبل امریکہ ہیوسٹن میں چینی قونصل خانہ بند کر چکا ہے جس کے جواب میں چین نے بھی اپنے شہر شینجو میں امریکی قونصلیٹ خالی کروا لیا تھا۔ علاوہ ازیں امریکہ کی جانب سے چین سے آنے والے طالب علموں پر بھی کئی پابندیاں متعارف کروائی جا چکی ہیں جبکہ امریکہ زیر تعلیم سب سے زیادہ غیر ملکی طالب علم چین ہی سے تعلق رکھتے ہیں۔

مبصرین کا کہنا ہے کہ چین کے ساتھ کشیدگی کی جو پالیسی صدر ٹرمپ نے شروع کی تھی امکان یہی ہے کہ وہ اپنا منصب چھوڑنے سے قبل چین کے خلاف سخت ترین اقدامات کرکے جائیں گے جس کی وجہ سے نومنتخب صدر کو مستقبل میں مشکلات کا سامنا کرنا پڑے گا۔

چین کا رد عمل

چینی وزارت خارجہ کے ترجمان  نے کہا ہے کہ امریکہ کہ یہ اقدام اس کے اپنے مفادات کے خلاف ہے۔ ایسے اقدامات امریکہ میں چین سے نفرت کرنے والے ایسے عناصر کی کارستانی ہے جو سرد جنگ کی ذہنیت رکھتے ہیں۔ یہ اقدام سیاسی دباؤ ڈالنے کے لیے اٹھایا گیا قدم ہے۔

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے