پنجاب میں لاک ڈاؤن کے دوران مارکیٹیں بند رکھنے کے شیڈول میں تبدیلیاں کرتے ہوئے 7 اضلاع میں اتوار کے روز کاروباری سرگرمیاں کھلی رکھنے کا فیصلہ کر لیا۔

تفصیلات کے مطابق پنجاب میں لاک ڈاؤن کے دوران مارکیٹیں بند رکھنے کے شیڈول میں تبدیلیاں کر دی گئیں اور مزید 7 اضلاع میں اتوار کے روز کاروباری سرگرمیاں کھلی رکھنے کا فیصلہ کر لیا۔

اضلاع میں گجرات، بھکر، میانوالی، منڈی بہاالدین، فیصل آباد، ٹوبہ اور ملتان شامل ہیں، متعلقہ اضلاع کو اتوار کی بجائے جمعہ ہفتہ مارکیٹیں بند رکھنے کا کہا گیا ہے۔

ترجمان نے کہا ہے کہ متعلقہ اضلاع میں مارکیٹیں شام 6 بجے ہی بند ہوں گی جبکہ راولپنڈی، جہلم، شیخوپورہ، چنیوٹ، خانیوال اور ڈی جی خان میں اتوار کو کاروبار کھلی رکھنےکی اجازت دی جا چکی ہے۔

یاد رہے وزیر صحت پنجاب ڈاکٹر یاسمین راشد نے اپنے بیان میں کہا تھا کہ پنجاب میں کرونا کے مثبت کیسز کی شرح بڑھ رہی ہے، جس کے پیش نظر حکومت نے اسمارٹ لاک ڈاؤن لگا کر پابندیاں بڑھائی ہیں۔

ڈاکٹر یاسمین راشد کا کہنا تھا کہ لاہور میں مثبت کیسز کی تعداد 12 فیصد تک پہنچ چکی ہے، شہریوں سے درخواست ہے، بزرگ شہریوں کو ویکسین لگوائیں، شہریوں کو ماسک پہن کر سب کو بچانا ہو گا۔