شاعر: احمد فراز

اس سے پہلے کہ بے وفا ہو جائیں 
کیوں نہ اے دوست ہم جدا ہو جائیں 

تو بھی ہیرے سے بن گیا پتھر 
ہم بھی کل جانے کیا سے کیا ہو جائیں 

تو کہ یکتا تھا بے شمار ہوا 
ہم بھی ٹوٹیں تو جا بجا ہو جائیں 

ہم بھی مجبوریوں کا عذر کریں 
پھر کہیں اور مبتلا ہو جائیں 

ہم اگر منزلیں نہ بن پائے 
منزلوں تک کا راستا ہو جائیں 

دیر سے سوچ میں ہیں پروانے 
راکھ ہو جائیں یا ہوا ہو جائیں 

عشق بھی کھیل ہے نصیبوں کا 
خاک ہو جائیں کیمیا ہو جائیں 

اب کے گر تو ملے تو ہم تجھ سے 
ایسے لپٹیں تری قبا ہو جائیں 

بندگی ہم نے چھوڑ دی ہے فرازؔ 
کیا کریں لوگ جب خدا ہو جائیں

آپ کا ردعمل؟

پوسٹ کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔


فیس بک کمنٹس